ਲੁਧਿਆਣਾ, 15 ਸਤੰਬਰ 2025
ਲੁਧਿਆਣਾ ਵਿੱਚ ਡੇਂਗੂ ਦੇ ਫੈਲਾਅ ਨੂੰ ਰੋਕਣ ਲਈ ਇੱਕ ਮਹੱਤਵਪੂਰਣ ਕਦਮ ਚੁੱਕਦੇ ਹੋਏ ਵਿਸ਼ਵ ਮਾਨਵ ਰੂਹਾਨੀ ਕੇਂਦਰ (VMRK) ਵੱਲੋਂ ਅੱਜ ਸਿਹਤ ਵਿਭਾਗ ਨੂੰ 25 ਸਪ੍ਰੇ ਪੰਪ ਦਾਨ ਕੀਤੇ ਗਏ। ਇਹ ਪੰਪ ਮੈਦਾਨੀ ਟੀਮਾਂ ਵੱਲੋਂ ਡੇਂਗੂ ਪ੍ਰਭਾਵਿਤ ਅਤੇ ਉੱਚ ਖ਼ਤਰੇ ਵਾਲੇ ਖੇਤਰਾਂ ਵਿੱਚ ਫਾਗਿੰਗ ਅਤੇ ਲਾਰਵੀਸਾਈਡ ਸਪ੍ਰੇ ਦੀਆਂ ਕਾਰਵਾਈਆਂ ਨੂੰ ਤੇਜ਼ ਕਰਨ ਲਈ ਵਰਤੇ ਜਾਣਗੇ।
ਦਾਨ ਦੇ ਨਾਲ-ਨਾਲ, ਵਿਸ਼ਵ ਮਾਨਵ ਰੂਹਾਨੀ ਕੇਂਦਰ ਦੇ ਸੇਵਾਦਾਰਾਂ ਨੇ ਹੈਲਥ ਵਰਕਰਾਂ ਦੇ ਨਾਲ ਮੈਦਾਨ ਵਿੱਚ ਸਰਗਰਮ ਹਿੱਸਾ ਲਿਆ ਅਤੇ ਫਾਗਿੰਗ ਤੇ ਸਪ੍ਰੇ ਕਾਰਵਾਈਆਂ ਵਿੱਚ ਸਹਿਯੋਗ ਕੀਤਾ। ਜਿੱਥੇ ਵੀ ਮੱਛਰਾਂ ਦੇ ਪੈਦਾ ਹੋਣ ਵਾਲੇ ਸਥਾਨ ਮਿਲੇ, ਉਥੇ ਜੋਇੰਟ ਟੀਮਾਂ ਨੇ ਤੁਰੰਤ ਉਪਚਾਰ ਕੀਤਾ ਅਤੇ ਲਾਰਵਾ ਦਾ ਨਾਸ਼ ਕੀਤਾ।
ਸਿਵਲ ਸਰਜਨ ਲੁਧਿਆਣਾ ਡਾ. ਰਮਨਦੀਪ ਕੌਰ ਨੇ VMRK ਦੇ ਯੋਗਦਾਨ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ, “ਵਿਸ਼ਵ ਮਾਨਵ ਰੂਹਾਨੀ ਕੇਂਦਰ ਵਰਗੀਆਂ ਸੰਸਥਾਵਾਂ ਦਾ ਯੋਗਦਾਨ ਡੇਂਗੂ ਨੂੰ ਕਾਬੂ ਕਰਨ ਵਿੱਚ ਬੇਮਿਸਾਲ ਹੈ। ਇਹ ਨਾ ਸਿਰਫ਼ ਸਾਨੂੰ ਸਰੋਤ ਅਤੇ ਮਨੁੱਖੀ ਸ਼ਕਤੀ ਮੁਹੱਈਆ ਕਰ ਰਹੀਆਂ ਹਨ, ਸਗੋਂ ਸਮਾਜਿਕ ਸਾਂਝ ਦਾ ਵੀ ਸ਼ਾਨਦਾਰ ਉਦਾਹਰਣ ਪੇਸ਼ ਕਰ ਰਹੀਆਂ ਹਨ।” ਉਨ੍ਹਾਂ ਲੋਕਾਂ ਅਤੇ ਹੋਰ ਸੰਸਥਾਵਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਵੀ ਅੱਗੇ ਆਉਣ ਤੇ ਡੇਂਗੂ ਰੋਕਥਾਮ ਮੁਹਿੰਮ ਨੂੰ ਮਜ਼ਬੂਤ ਕਰਨ।
ਮੁਹਿੰਮ ਡਾ. ਸ਼ੀਤਲ ਨਾਰੰਗ (ਹੈਲਥ ਡਿਪਾਰਟਮੈਂਟ) ਵੱਲੋਂ ਨਿਗਰਾਨੀ ਕੀਤੀ ਗਈ। ਉਨ੍ਹਾਂ ਨੇ VMRK ਦੇ ਸੇਵਾਦਾਰਾਂ ਦੀ ਪ੍ਰਸ਼ੰਸਾ ਕੀਤੀ ਜਿਹੜੇ ਹੈਲਥ ਟੀਮਾਂ ਦੇ ਨਾਲ ਮਿਲ ਕੇ ਕੰਮ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੇ ਸਾਂਝੇ ਯਤਨ ਨਾਲ ਮੱਛਰ ਪੈਦਾ ਹੋਣ ਵਾਲੇ ਹਾਟਸਪਾਟ ਦੀ ਪਛਾਣ ਤੇ ਨਾਸ਼ ਦੀ ਕਾਰਵਾਈ ਤੇਜ਼ ਹੋ ਜਾਂਦੀ ਹੈ।
ਹੈਲਥ ਡਿਪਾਰਟਮੈਂਟ ਨੇ ਦੁਹਰਾਇਆ ਕਿ “ਹਰ ਸ਼ੁੱਕਰਵਾਰ, ਡੇਂਗੂ ਤੇ ਵਾਰ” ਮੁਹਿੰਮ ਹਫ਼ਤੇ ਵਿੱਚ ਹਰ ਸ਼ੁੱਕਰਵਾਰ ਨੂੰ ਕੀਤੀ ਜਾਂਦੀ ਹੈ। ਨਵੇਂ ਦਾਨ ਕੀਤੇ ਗਏ ਸਪ੍ਰੇ ਪੰਪ ਮੈਦਾਨੀ ਟੀਮਾਂ ਵਿੱਚ ਵੰਡੇ ਜਾਣਗੇ ਤਾਂ ਜੋ ਸ਼ਹਿਰੀ ਅਤੇ ਪਿੰਡੂ ਦੋਵੇਂ ਖੇਤਰਾਂ ਵਿੱਚ ਪ੍ਰਭਾਵਸ਼ਾਲੀ ਕਾਰਵਾਈ ਕੀਤੀ ਜਾ ਸਕੇ।
ਜ਼ਿਲ੍ਹਾ ਪ੍ਰਸ਼ਾਸਨ, ਹੈਲਥ ਡਿਪਾਰਟਮੈਂਟ ਅਤੇ ਵਿਸ਼ਵ ਮਨਵ ਰੂਹਾਨੀ ਕੇਂਦਰ ਵਰਗੀਆਂ ਸਮਾਜਿਕ ਸੰਸਥਾਵਾਂ ਦੇ ਸਾਂਝੇ ਯਤਨਾਂ ਨਾਲ, ਲੁਧਿਆਣਾ ਡੇਂਗੂ-ਮੁਕਤ ਸ਼ਹਿਰ ਬਣਨ ਵੱਲ ਇੱਕ ਹੋਰ ਕਦਮ ਵਧਾ ਰਿਹਾ ਹੈ।
